ህወሓት የክልሉን ሕዝብ ጥያቄዎች ለመመለስ በቁርጠኝነት እንደሚሰራ ገለፀ

የሕዝባዊ ወያኔ ሓርነት ትግራይ /ህወሓት/ የክልሉን ሕዝብ ጥያቄዎች ለመመለስ በቁርጠኝነት እንደሚሰራ ገለፀ፡፡

ድርጅቱ ከመስከረም 22 እስከ 28/2010 ሲያካሄድ የቆየውን የማዕከላዊ ኮሚቴ ጉባኤ አጠናቋል፡፡

በጉባኤው የ2ዐዐ9 የድርጅትና የመንግሥት ሥራዎችና የተጀመሩ የጥልቅ ተሀድሶ ሂደቶች አፈፃፀምን ገምግሟል፡፡

ጉባኤው በጥልቅ ተሀድሶ የተለዩትን የኪራይ ሰብሳቢነት አስተሳሰብ እና የመልካም አስተዳደር ችግሮችን መርምሯል፡፡

“”እየታደስን እንሰራለን እየሰራን እንታደሳለን”” በሚል መሪ ቃል የተካሄደው ይህ ጉባኤ በመርህ ላይ የተመሠረተ አንድነት በማጠናከር የክልሉ ሕዝብ ጥያቄዎችን በቁርጠኝነት ለመመለስ እንደሚሰራም ነው የተገለፀው፡፡

በትግራይና በአማራ ክልሎች መካከል ከግጨው ጋር በተያያዘ የወሰን መካለል ጉዳይ በጊዜው ሳይፈታ መቆየቱ ችግር ማስከተሉን ገምግሞ፣በአሁኑ ጊዜ በሁለቱም ድርጅቶችና ሕዝቦች ትብብር ለአንዴና ለመጨረሻ ጊዜ መፍታቱን መግለጫው ጠቅሷል፡፡

ጠባቦችና የትምክህት ኃይሎች የተለያየ ስልት በመጠቀም የፌዴራል ሥርዓቱን ለማፍረስ የሚያደርጉት እንቅስቃሴንም ትኩረት ሰጥቶ ተመልክቶታል፡፡

በቅርቡ የኦሮሚያና የኢትዮጵያ ሶማሌ አዋሳኝ አካባቢዎች በተከሰተ ግጭት ምክንያት በደረሰው የሕይወትና ንብረት ጉዳት የተሰማውን ጥልቅ ሀዘን ገልጿል፡፡

ፓርቲው ችግሩን መርህን ማዕከል ባደረገ መልኩ መፍትሔ እንዲያገኝ ከድርጅቶች ጎን በመሆን እንደሚሰራ ገልጿል፡፡

ማዕከላዊ ኮሚቴው የሴቶችን፣ ወጣቶችን እንዲሁም ምሁራን ተሳትፎና ተጠቃሚነት ለማሳደግ በትጋት እንደሚሰራም በመግለጫው ጠቅሷል፡፡

የተጀመረውን የሕዳሴ ጉዞ ከዳር ለማድረስ ውስጣዊና ውጫዊ ችግሮችና ፈተናዎችን በፅናት ለመታገል ቆርጦ እንደተነሳም በኢቢሲ በላከው መግለጫ  አስታውቋል፡፡

Leave a Comment